Desde a ría de Arousa ata a de Vigo encadéanse estas illas,
emerxendo do océano e embelecendo a paisaxe mariña coa maxia dos seus
acantilados. Nas súas entrañas, no fondo do mar, gárdanse as máis prezadas
riquezas ecolóxicas deste Parque Nacional, custodiadas polos canóns dos antigos
buques aquí afundidos. É sen lugar a dúbidas un lugar onde descubrir os
misterios e lendas do Atlántico.
Representa sistemas naturais ligados a zonas costeiras e plataforma
continental da Rexión Eurosiberiana. Os acantilados, as matogueiras, as dunas e
as praias, así como os distintos fondos mariños (de rocha, area, de cuncha…)
crean un gran mosaico de ecosistemas nestas illas e as augas que as rodean.
Esta diversidade de escenarios dá cabida a un gran número de especies: máis
de 200 tipos de algas entre as que se refuxian e crían gran cantidade de peixes
e moluscos, aves mariñas que aniñan nas repisas dos acantilados e pescan nas
augas pouco profundas, plantas sorprendentemente adaptadas a vivir entre as
areas das dunas ou nas estreitas fendas dos acantilados...A conservación destes
valores naturais é un reto no que todos debemos participar.
Desde o 1 de xullo de 2008, a xestión do Parque Nacional Marítimo -
Terrestre das Illas Atlánticas de Galicia corresponde en exclusiva á Comunidade
Autónoma de Galicia.
- REAL DECRETO 1082/2008, do 3 de
xuño, sobre a ampliación das Funcións e servizos da Administración do Estado
traspasados á Comunidade Autónoma de Galicia, en materia de conservación da
natureza (Parque Nacional Marítimo Terrestre das Illas Atlánticas de
Galicia).
|
